Air an darna latha agam ann an Lunnainn, dhùisg mi tràth sa mhadainn is mus do dh’fhosgail mi mo shùilean smaoinich mi “a bheil mi ag obair an-diugh? A bheil agam ris a’ chlann a dheisleachadh airson na sgoile?”
Agus an uair sin, chuimnich mi gun robh mi ann an Lunnainn air safari rèile!
B’ e am plana agam a dhol air pàirtean den Underground nach d’rinn mi riamh roimhe. Bha fios agam mar-thà gun robh an District line agus an Hammersmith and City gu bhith dùinte ach nuair a thug mi sùil air app TfL, fhuair mi a-mach gun robh pàirtean de loidhne a’ Phicadilly gu bith dùinte cuideachd.
Mar sin, bha an t-àm ann ann airson cofaidh is planadh.
Chaidh mi gu cafaidh faisg air stèisean tiùb Goodge Street agus bha mi ag òl cofaidh a-muigh agus a’ coimhead air mapaichean.
Ri mo thaobh, bha fear òg a bha a’ smocadh. Stad cailleach gus bruidhinn ris.
“Ah son, I wish I could still smoke. I used to smoke. A lot. But now I’ve got asthma. It’s because I smoked low quality fags.”
Mise, a’ smaoineachadh dhomh fhèin: “Hmm, saoil an e uiread nan toitean bu chòireach seach càileachd nan toitean bu chòireach”.
Às dèidh caffeine agus cluich le aplacaid TfL, cho-dhùin mi gun robh mi a’ dol a chur crìoch air an Northern Line (Edgeware Branch) agus gun robh mi an uair sin a dol a dh’fhaighinn bus gu Stanmore aig deireadh an Jubilee Line.
Agus sin na rinn mi! Sin dà loidhne a tha a-nis dèanta air an liosta agam! Tha Stanmore fìor mhath oir tha tòrr thrèanaichean air an cumail ri taobh an stèisein agus fhuair mi dealbh no dhà.
SSS
Chaidh mi air an tiùb agus air an Overgound an uair sin gu Richmond. Às dèidh cofaidh, chaidh mi air misean cudromach – chaidh mi a lorg an taighe a bh’ aig Phil Lynott nach màireann aig Thin Lizzy!
‘S e Pagoda House an t-ainm a th’ air oir tha e gu math faisg air Kew Gardens agus chithear am pagoda. Thog mi dealbh luath agus dh’èist mi ri beagan Lizzy fhad’s a bha mi a’ feitheimh ris a’ bhus dhachaigh.
An uair sin, bha mi airson a dhol gu Tottenham, oir leugh mi gum faicear depot a’ Victoria line an sin – an t-aon àite far am bi na trèanaichean os cionn na talmhainn. Mar sin, fhuair mi an tiùb, trèana, tiùb eile agus bus gu stad bus aonarach air a bheil “Northumberland Park Rail Depot”. Lorg mi drochaid thairis air an rathad-iarainn agus mhothaich mi gun robh mesh ga chuairteachadh. Gu fortanach, b’ urrainn dhomh lionsa an iphone agam faicinn tron mhesh agus fhuair mi dhealbh no dhà!
Agus leis a sin, bha an t-àm ann dèanamh air Glaschu a-rithist – fear de na trèanaichean Azuma spaideil ùr aig LNER.
Abair turas a bh’ agam – 27 tursan trèana, 7 tursan bus agus turas air càr-càbail agus beagan eachdraidh Thin Lizzyach!
Nuair a bha mi nam bhalach, bha leabhar agam air an robh British Electric Trains in Camera. Bha e làn dealbhan de thrèanaichean dealanach air feadh na RA, a’ gabhail a-steach BR, London Underground, Subway Ghlaschu agus an Tyne and Wear Metro.
Bha mi beò ghlaicte leis an leabhar agus leis na dealbhan ann.
Nam inbheach, tha mi air a bhith a’ feuchainn ris na trèanaichean a b’ fheàrr leam bhon leabhar fhaicinn san fheòil, mar gum biodh, agus mar thoradh air sin, chaidh mi gu Lunnainn bho chionn goirid.
Ach bha àite eile bhon leabhar a bha mi airson fhaicinn – Stèisean Broad Street.
Nuair a chanas mi ‘faicinn’, bu chòir dhomh a ràdh nach eil Stèisean Broad Street ann tuilleadh. Chaidh a leigeil ann an 1986, ach chaidh mi a dh’fhaicinn far an robh e agus gus faicinn na bha air fhàgail dheth.
Bha Broad Street ri taobh Stèisean Liverpool Street agus tha ionad Broadgate a-nis na aite.
Tha gu leòr termini air fhàgail: Blackfriars, Cannon Street, Charing Cross, Euston, Fenchurch Street, Liverpool Street, London Bridge, King’s Cross, Paddington, Victoria, Waterloo, Marylebone, Moorgate and St Pancras, ach bha rudeigin sònraichte mu Bhroad Street, rudeigin gu math “atmospheric”.
Bha dealbh den stèisean san leabhar agam le le teacsa mar “The long term future of the decrepit Broad Street Station is unknown” le dealbh de thrèanaichean Class 501.
Bha an dealbh caran coltach ris an dealbh seo:
Stèisean Broad Street c1983
Dhùin Broad Street fhèin agus stèisean Dalston Junction dìreach beagan a tuath air cuideachd. ann an 1986
Ach ged a bha BR a’ smaoineachadh nach robh feum air an stèisean tuilleadh, bha iad ceàrr. Ged a chaidh Broad Street fhèin a leigeal, chaidh an loidhne ath-fhosgladh gu beagan a tuath air agus chaidh a’ mhòr-chuid den drochaid a-staigh dhan stèisean ath-fhosgladh mar phàirt den London Overground ann am pròiseact sònraichte gus Loidhne Lunnainn a Tuath agus Loidhne Lunnainn an Ear a cheangail ri chèile mar phàirt de chearcall timcheall air a’ bhaile. Mar sin, an àite a bhith a’ stad aig terminus mar a bhoidh iad roimhe, tha an loidhne a’ dol seachad air làrach Broad Street, a’ dol tro stèisean ùr aig Shoreditch High Street agus an uair sin a’ dol air Loidhne Lunnainn an Ear, a bha na pàirt den London Underground gu 2007.
Mapa den Overground, 2012
Seo mapa rèile den sgìre a’ sealltainn far an robh Broad Street agus dè tha air tachairt leis na loidhnichean bhon uair sin:
Chaidh Dalston Junction ath-fhosgladh cho math ri stèiseanan ann an Haggerston, Hoxton agus Shoreditch High Street anns na 2010an. A-nis, tha na figearan mar a leanas: Dalston Junction: 6 millean cleachdaichde sa bhliadhna, Haggerston 3.5m, Hoxton 3.2m, Shoreditch High Street, 9 m.
Ach ged nach eil Broad Street ann tuilleadh, tha cuimhneachadh gu math inntinneach air fhàgail.
Air an drochaid a b’ àbhaist a bhith a’ dol a-staigh dhan stèisean, tha dà thrèana tiùb ann (London Underground 1983 stock) a tha a-nis nan stiùdiothan mar phàirt den ionad Village Underground.
Agus ma tha thu airson coimhead air Broad Street air film, rinn Paul McCartney film (film caran lapach, feumar a ràdh) far an robh an stèisean ann – Give my Regards to Broad Street (1984).
Tron Ghlasadh-sìos, tha mi air a bhith a’ dèanamh fiughair ri faighinn a-mach às an taigh, agus a-mach à Glaschu agus a dhol air safari-rèile no dhà a-rithist!
Thòisich mi am bloga seo bho choinn 10 bliadhna (wow!) agus aig an toiseach, bha mi airson a dhol air gach rathad-iarainn ann an Alba agus sgrìobhadh mu dheidhinn sin. Tha mi air sin a dhèanamh a-nis agus tha mi air a h-uile rathad-iarainn ann an Èirinn a Tuath a dhèanamh cuideachd.
Bhiodh e math a dhol air gach rathad-iarainn ann an Sasainn a bharrachd ach tha an uiread dhiubh ann is nach eil mi a’ smaoineachadh gum bi tìde no airgead gu leòr agam fiù ’s ma bhios mi beò gus am bi mi 100!
Mar sin, tha mi a-nis a’ feuchainn ri dhol air gach rathad-iarainn sa Chuimrigh agus gach meatro ann am Breatainn is Èirinn (siostaman trama agus fo-thalamh). Cumaidh mi orm a dhol gu rathaidean-iarainn inntinneach ann an Sasainn cuideachd, ge-tà!
Co-dhiù, chuir mi romhan gun robh mi airson a dhol a Lunnain airson a dhol air barrachd loidhnichean meatro agus gus taigh-tasgaidh sònraichte fhaicinn,.
‘S ann air an adhbhar seo a rinn mi air stèisean a’ Mheadhain aig 10f airson a dhol air a’ Chaledonian Sleeper. Tha mi air a bhith air a’ chadalaiche iomadh turas roimhe, ach seo a’ chiad turas a bha mi ann air na trèanaichean ùra.
Bha na seann trèanaichean 40 bliadhna a dh’aois no mar sin, agus cha robh na goireasan cho math ’s a bhiodh daoine an dùil ris san latha an-diugh. Fhuair mi cathair an àite leabaidh a chionn ‘s gu bheil sinn nas saoire. Chosg e £68 – tòrr nas daoire na bha e nuair a bha an cadalaiche le ScotRail – ach tòrr nas saoire na tiocaid trèana agus taigh-òsta ann an Lunnainn.
Cò ris a tha an trèana ùr coltach?
Tha i gu math spaideil! Tha na seataichean tòrr nas fheàrr, le rùm gu leòr airson do chasan. Tha socaidean ann gus coimpiutairean agus fònaichean a phlugadh a-steach agus tha solas leughaidh ann. Agus eu-coltach ris na seann trèanaichean, tha wifi ann. Gu mì-fhortanach, ge-tà, cha do dh’obraich an wifi ro mhath – bha mi a’ feuchainn ri post-d a sgrìobhadh agus gus am Faclair Beag a chleachdadh ach bha e cho slaodach is gun do sgur mi a bhith ag obair.
Tha an clàr-bìdh math agus chan eil na prìsean ro àrd. Air na trèanaichean ùra, putaidh tu putan os cionn na cathrach agad gus innse dhan luchd-obrach gu bheil thu airson biadh no deoch òrdachadh.
Rud eile a bha math, ‘s e gun robh an trèana gu math luath! Ràinig sinn Lunnainn leth-uair a thìde air thoiseach air a’ chlàr-ama. ‘S e duilgheadas a th’ aig a’ chadalaiche gum bi tòrr thrèanaichean bathair a’ ruith tron oidhche is gum bi obair-chàraidh a’ tachairt an uair sin cuideachd. Bidh an trèana gu math tric uair a thìde air dheireadh, rud nach eil idir math airson daoine a tha a’ dol gu Lunainn no Alba airson coinneamhan sa mhadainn.
An uair sin, chaidh mi dhan taigh-òsta gus mo bhaga a chur a-steach agus thòisich mi air latha fada de spòrs air cuibhlean meatailt!
An tòiseach, chaidh mi gu Ceàrnag Trafalgar. Tha mi air tòiseachadh air “peantadh le àireamhan” a dhèanamh. Nuair a tha mi a’ faireachdainn caran stressta, chan eil rud sam bith cho math ri bith ag obair air dealbh snog. B’ e dealbh de Whitehall a’ coimhead bho Trafalgar Square a bh’ anns a’ chiad dealbh agam. Chaidh mi ann gus dealbh-camara a thogail den t-sealladh an da-rìribh.
Bha mi ann ro 7m agus bha a’ Chearnag samhach falamh agus bha e uamhasach math a bhith ann leum fhèin leis na leòmhannan mòra! Cha robh na rathaidean cho samhach, ge-tà agus thug e grèis dealbh fhaighinn den t-sealladh a bha mi ag iarraidh. Bha agam ri a thogail ann an “eilean trafaig” agus fiù’s leis a sin, cha b’ urrainn dhomh buileach an aon sealladh fhaighinn – saoilidh mi gun robh an dealbh tùsail a’ coimhead bho mheadhan an rathaid agus cha robh mi airson a bhith air mo leigeal le bus airson dealbh a thogail!
Ghaibh mi bracaist ann an cafè le sealladh den Cheàrnag agus an uair sin chaidh mi air an tiùb gu Lambeth a Tuath oir tha depot aig Loidhne a’ Bhakerloo an sin agus bha mi airson dealbhan a thogail.
Nis, bha mi den bheachd gum biodh e furasta dealbh fhaighinn oir chunnaic mi gu leòr dealbhan air loidhne. Thug mi sùil air Google Streetview mus deach mi ann agus bha a h-uile rud a’ coimhead OK. Nuair a chaidh mi ann, ge-tà, bha am balla tòrr na bu mhotha na bha e a’ coimhead air a’ choimpiutair. Feumaidh gun robh àradh no bogsa aig na daoine a thog na dealbhan!
Bhithinn air feuchainn ri a shreap ach bha seo ann an Àrd-shràid Lambeth agus bha tòrr dhaoine ann fiù ‘s aig 8 sa mhadainn! Chuir mi an camara os mo chionn is thog mi dealbh no dhà – agus bha iad math gu leòr – ach a-mhàin nach robh na trèanaichean ann! Feumaidh gun robh iad uile trang anns na tunailean!
K
Bha sin OK, ge-tà oir cha deach mi ann airson sin co-dhiù – bha mi ann airson a dhol dhan Acton Depot. Seo an tasglann aig Taigh-tasgaidh Còmhdhail Lunnainn far am bi iad a’ cumail nan rudan nach eil iad a’ sealltainn san taigh-tasgaidh fhèin ann an Covent Garden.
Am measg nan rudan a th’ ann, tha trèanaichean, tramaichean, tràlaidhean is busaichean cho math ri ealain, soidhnichean, uidheamachd is barrachd. Tha e duinte dhan phobal mar as trice ach fosglaidh e dhà no trì tursan gach bliadhna.
Agus tha àiteachan mar seo a’ fàs nas cudromaiche oir tha tòrr de na taighean-tasgaidh air fàs caran “dumbed down” nam beachd – Taigh-tasgaidh Taobh na h-Aibhne ann an Glaschu agus Taigh-tasgaidh Còmhdhail Lunnainn nam measg – le barrachd cuideam air eachdraidh-shòisealta seach air còmhdhail fhèin agus le nas lugha de bhusaichean is tramaichean 7c rim faicinn na bha roimhe.
Mar sin, ma tha thu airson coimhead air tramaichean an àite a bhith ag ionnsachadh mar a bhiodh daoine ann an Glaschu a’ dannsadh aig deireadh na seachdain, seo an seòrsa àite dhut!
Tha meanbh rathad-iarainn aig an Depot air a bheil an London Transport Miniature Railway. Mar a bhiodh tu an dùil, tha na trèanaichean uile dealanach agus tha an loidhne gu math fada agus tha siognalan dealanach ann gus an urrainn barrachd air aon trèana a ruith aig an aon àm.
An uair sin, chaidh mi a-steach dhan Depot fhèin.
Chaidh mi ann gu sònraichte gus trèana ghlèidhte bhon Waterloo & City Line fhaicinn agus b’ e sin a’ chiad rud a chunnaic mi nuair a chaidh mi tron doras. Chunnaic mi a’ chiad bus-tràilidh ann an Lunnainn – an Diddler, bus-tràilidh nas ùire agus grunn thramaichean.
Bhruidhinn tè de na curators rium – “oh, it’s you again! I’m glad you’ve come along to see us once more!”. Cha robh mi ann riamh roimhe is mar sin, feumaidh gu bheil doppleganger agam!
A bharrachd air na tràmaichean is tràilidhean, bha gu leòr trèanaichean tiùb ann cuideachd. Tha mi gu math deidheil air Eilean Wight agus bha dà sheòrsa trèana aca a bha uair a’ ruith seirbheisean rèile san eilean: 1923 stock (no Standard stock) agus 1938 stock.
Tha na trèanaichean agus an taigh-tasgaidh seo air a bhith air mo liosta-bhucaid cho fada is gun robh mi air mo dhòigh glan.
Às dèidh sùil air a h-uile rud, bha an t-àm ann airson srùbag…. agus beagan thrèanaichean.
Bha mi an dùil a dhol air gach pàirt den lìonra aig London Underground nach do rinn mi roimhe aig an deireadh sheachdain, ach gu mi-fhòrtanach, bha tòrr loidhnichean dùinte agus mar sin, rinn mi air càr-càbaill Lunnainn.
Agus an uair sin, rinn mi air meadhan a’ bhaile air an DLR gus coimhead air na tha air fhàgail de Stèisean Broad street.
Each week we publish the text of our Gaelic Word of the Week podcast here with added facts, figures and photos for Gaelic learners who want to learn a little about the language and about the Scottish Parliament – Pàrlamaid na h-Alba. This week our word is swearing in – A’ mionnachadh. Wednesday saw the first … Leugh an corr de Gaelic Word of the Week blog – A’ mionnachadh – swearing in
Nuair a bha mi nam bhalach òg, bha leabhar sònraichte agam. Chan e Lord of theRings no Pride and Prejudice a bh’ ann no fiù ’s the Making of the Crofting Community!
Nuair a bha mi mu 12 bliadhna a dh’aois, b’ e leabhar air an robh British Electric Trains in Camera le John Glover a b’ fheàrr leam.*
Tha an leabhar, a chaidh fhoillseachadh ann an 1982, a’ tòiseachadh leis na faclan:
“The electric multiple-unit or emu is perhaps the most mundane of all railway rolling stock.”
John Glover, British Electric Trains in Camera
Cha mhòr nach eil sin cho math ri: “It was the best of times, it was the worst of times!”
Ach bha an t-ùghdar a’ dèanamh puing chudromach – tha a’ mhòr-chuid de na tursan trèana san RA air trèanaichean dealanach a tha nan ioma-aonadan (multiple units), ’s e sin ri ràdh càraichean-rèile, no aonadan-rèile: caraistean le einnseanan.
Nuair a smaoineachas daoine, fiù’s daoine a tha beò-ghlacte le rathaidean-iarainn, bidh iad a’ smaoineachadh air locothan mòra cumhachdach, dìosail no smùid, a’ tarraing trèanaichean, leithid Deltic no am Flying Scotsman. Cha bhi iad a’ smaoineachadh air trèanaichean beaga dealanach air loidhne Canàl Phàislig no trèanaichean tiùb Lunnainn.
Class 55 Deltic ann an Inbhir Theòrsa air turas rèile
Mar sin, tha an t-ùghdar ceart. Do chuid, chan eil aonadan dealanach uamhasach inntinneach ach air an làimh eile, tha iad fìor fìor chudromach. Agus b’ e amas an ùghdair rud beag a bharrachd sanasachd a thoirt do na h-eich obrach seo agus sealltainn cho cudromach sa bha iad.
Tha an leabhar a’ coimhead air gach seòrsa aonad-rèile dealanach – an lìonra nàiseanta, Metro Tyne and Wear, London Underground agus Subway Ghlaschu.
Chaidh an leabhar a sgrìobhadh aig àm nuair a bha tòrr ag atharrachadh. Bha tòrr trèanaichean bho na 1940an no fiù ’s nas sine fhathast a’ ruith ach bha ginealach ùr de thrèanaichean ùra a’ tighinn a-steach. Agus thug e seachad deagh bhlas de gach pàirt den lìonra rèile.
Tha tòrr loidhnichean neo-àbhaisteach ann, leithid trèanaichean tiùb ann an Eilean Wight agus an Tyne and Wear Metro.
Leugh mi an leabhar uair is uair agus nuair a ghabh mi ùidh ann an rathaidean-iarainn a-rithist nam inbheach, chuir mi romham na trèanaichean a b’ fheàrr leam bhon leabhar fhaicinn san fheòil, mar gum biodh.
Chaidh mi gu Eilean Wight ann an 2013 gus na seann trèanaichean tiùb fhaicinn a bha a’ ruith nan seirbheisean rèile ann.
Ach ged a chunnaic mi tòrr de na trèanaichean inntinneach, tha rud no dhà agam ri fhaicinn fhathast!
Ann an 2021, tha mi a’ dol air turas gus trèana eile bhon leabhar fhaicinn – trèana bho Loidhne Waterloo and City ann an Lunnainn. Bha dealbhan san leabhar de na trèanaichean beaga a bha air an loidhne eadar 1940 agus 1994. Tha mi air post bloga a sgrìobhadh mun loidhne ghoirid inntinnich fo-thalamh seo a bha le BR ach a chaidh a thoirt do London Underground ann an 1994.
na duilleagan ann am British Electric Trains in Camera mun Waterloo and City
Chaidh tè de na trèanaichean beaga a ghlèidheadh agus a sgeadachadh ann an London Transport Museum Depot ann an Acton agus tha latha fosgailte gu bhith aca aig deireadh a’ Chèitein agus tha mi air tiocaidean fhaighinn agus air àite a chur air dòigh air a’ chadalaiche – An Caledonian Sleeper.
Tha Tasglann an Taigh-tasgaidh fìor mhòr le trèanaichean, tramaichean, busaichean-tràilidh is tòrr a bharrachd agus tha e air a bhith air an liosta-bhucaid rèile agam fad iomadh bliadhna.
Chan fhada gus am bi taghadh Pàrlamaid na h-Alba ann agus tha manifestothan nam pàrtaidhean uile air tighinn a-mach.
Dè tha iad ag ràdh mu rathaidean-iarainn?
Tòrr, feumar a ràdh! Agus eu-choltach ri ceistean connspaideach mar am bunreachd, tha e coltach gu bheil tòrr aonta ann eadar na prìomh phàrtaidhean.
Seo na pìosan bho na manifestothan uile (anns an òrdugh anns an tàinig iad a-mach). Tha ùidh shònraichte agam ann am fosglaidhean/ath-fhosglaidhean rèile agus tha mi air na pìosan a chur ann gu sònraichtemu rathaidean-iarainn ùra.
Am Pàrtaidh Uaine
Seo ceangail ri Rail For All. Tha an aithisg a’ moladh tòrr ath-fhosglaidhean rèile.
An SNP
Liberalaich Dheamocratachna h-Alba
Tòraidhean na h-Alba
Prìomh Mhainifesto nan Tòraidhean Mini-manifesto nan Tòraidhean airson Ear-thuath na h-Alba
Pàrtaidh Làbarach na h-Alba
Alba
Cha b’ urrainn dhomh iomradh sam bith a lorg air rathaidean-iarainn ann am manifesto Pàrtaidh Alba.
A rèir coltais, tha co-aonta ann gu bheil feum air rathaidean-iarainn ùra, a’ gabhail a-steach rathaidean-iarainn ùra ann an sgìrean dùthchail. Tha leudachadh Loidhne a’ Waverley gu Hawick agus Carlisle air ainmeachadh gu tric gu sònraichte.
Ged nach robh rùm gu leòr gus a h-uile rud bho na manifestothan mu dheidhinn còmhdhail a chur an seo, tha tòrr annta cuideachd mu shiostam thiocaidean nas fheàrr a bhios freagarrach airson dìofar mhodhan còmhdhail.
Chì sinn dè thachras san taghadh, ach ge b’ e cò a bhuannaicheas, tha e coltach gum bi rathaidean-iarainn ùra againn! Nach math sin.
Dè an rathad-iarainn ùr a b’ fheàrr leat fhaicinn an Alba? Waverley Route? Cill Rìmhinn? Ceann Phàdraig/Baile nam Frisealach? Allmhaigh-Dùn Phàrlain? Crois-rèile Ghlaschu? South-sub Dhùn Èideann? Eile? Leig fios gu h-ìosal!
Tha iomairt ùr air tòiseachadh airson ath-bheothachadh rèile ann an Siorrachd Obar Dheathainn: an Iomairt Rèile an Ear-thuath.
Chan eil teagamh sam bith ann nach e Ear-thuath na h-Alba an t-àite ann an Alba far a bheil na beàrnan as motha ann an lìonra na h-Alba.
Ged is e Obar Dheathain an treas cathair-bhaile as motha ann an Alba, chan eil ach dà stèisean rèile ann: Obar Dheathain fhèin agus Deis (Dyce) a tha a’ faisg air a’ phort-adhair.
Agus ann an Siorrachd Obar Dheathain, chaidh an lionra rèile a sgrios gu mòr sna 1960an le tòrr bhailtean mòra agus bailtean dùtchail nach eil air am frithealadh le trèanaichean tuilleadh.
Ma tha thu airson faicinn cho dona ’s a bha na geàrraidhean, seo mapa seo de na rathaidean-iarainn san sgìre ann an 1867:
Seo Schd Obar Dheathain an-diugh – dìreach loidhne Inbhir Nis-Obar Dheathain agus loidhne Glaschu/Dùn Èideann-Obar Dheathain air fhàgail
Tha an iomairt seo ag iarraidh an ana-cheartais seo a chur ceart le loidhnichean ùra do Cheann Phàdraig, Baile nam Frisealach (taobh Eilean) agus gu Beanncharaidh.
Seo molaidhean na h-iomairt:
Seo molaidhean na buidhne bhon làraich-lìn aca
Ged is iomairt ùr a tha seo, tha iad air tòiseachadh ann an dòigh gu math làidir is pròifeiseanta le tòrr obair coiteachaidh a’ dol air adhart le tagraichean airson taghadh Pàrlamaid na h-Alba.
Ma tha thu airson taic a chumail ris an iomairt chudromaich seo, soidhnig an athchuinge.
Gur math a thèid leis an iomairt seo. An dòchas nach bi e ro fhada mus faic sinn soidhnichean mar seo a dh’aithghearr!
Each week we publish the text of our Gaelic Word of the Week podcast here with added facts, figures and photos for Gaelic learners who want to learn a little about the language and about the Scottish Parliament – Pàrlamaid na h-Alba. This week our work is butterfly – dealan-dè. It is now Spring – an … Leugh an corr de Gaelic Word of the Week blog – Butterfly – dealan-dè
Each week we publish the text of our Gaelic Word of the Week podcast here with added facts, figures and photos for Gaelic learners who want to learn a little about the language and about the Scottish Parliament – Pàrlamaid na h-Alba. This week we are looking at Easter – A’ Chaisg. It is currently the Scottish … Leugh an corr de Gaelic Word of the Week blog – Easter – a’ Chàisg
Each week we publish the text of our Gaelic Word of the Week podcast here with added facts, figures and photos for Gaelic learners who want to learn a little about the language and about the Scottish Parliament – Pàrlamaid na h-Alba. This week we are looking at the Lockdown – an Glasadh-sìos. Its roughly a … Leugh an corr de Gaelic Word of the Week blog – lockdown – Glasadh-sìos
#/media/File:Broad_Street_station_exterior_geograph-3270123-by-Ben-Brooksbank.jpg){kind=link}
